Vassforskrifta

EU sitt rammedirektiv for vatn (2000/60EF) er gjennomført i norsk rett gjennom forskrift om rammer for vassforvaltning datert 15.12.2006 - vassforskrifta. Hovudformålet med forskrifta er å verne om, og om nødvendig forbetre, tilstanden i ferskvatn, grunnvatn og kystnære område. Vassforskrifta gjev rammer for å fastsetje miljømål som skal sikre best mogeleg heilskapleg vern og bærekraftig bruk av vatnet. Forskrifta er heimla i plan- og bygningslova, forureiningslova, vassressurslova og naturmangfaldlova. På denne bakgrunn er det lagt ned eit omfattande arbeid  for å betre miljøtilstanden i norske vassdrag. Vassplanarbeidet er organisert i vassregionar der den enkelte vassregion har gjennomført planprosess og plantiltak for å fastsetje miljømål for vassdrag - også i vassdrag med vasskraftproduksjon. Det er utarbeidd og vedteke regionale forvaltningsplanar og lokale tiltaksprogram med sikte på å oppfylle miljømåla, og skaffe til vege nødvendig kunnskapsgrunnlag for dette arbeidet.